ສ​ປ​ປ​ ລາວ ພົບ​ຜູ້​ຕິດ​ເຊື້ອທັງ​ໝົດ 16 ຄົນແລ້ວ

ສ​ປ​ປ​ ລາວຫລ້າ​ສຸດ​ຜົນ​ກວດພົບ​ຜູ້​ຕິດ​ເຊື້ອເພີ່ມ​ຂື້ນ 1 ຄົນ ລວມ​ເປັນ 16 ຄົນ.

ໃນ​ວັນ​ທີ່ 9 ເມ​ສາ 2020ນີ້, ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດ​ອັກ​ເສບ​ປອດ​ COVID-19 ໄດ້​ຖະ​ແຫລ່ງ​ການເຖິງ​ສະ​ພາບ​ການຂອງ ພະຍາດ​ອັກ​ເສບ​ປອດ​ COVID-19 ມາ​ຮອດ​ປະ​ຈຸ​ບັນ​ນີ້, ຜົນ​ກວດ​ຂອງວັນທີ 8 ເມສາ 2020 ພົບ​ຜູ້​ຕິດ​ເຊື້ອ 1 ຄົນ ລວມ​ເປັນ​ທັງ​ໝົດ 16 ຄົນ ຢູ່​ ສ​ປ​ປ ລາວ

ພາບ: pasaxon.org.la

ປະຫວັດການສຳພັດກັບພະຍາດ ຂອງ​ຜູ້​ຕິດ​ເຊື້ອ​ຄົນ​ທີ 16 ມີ​ດັ່ງ​ນີ້:

ວັນທີ 26 ມີນາ ແມ່ນໄດ້ມີການຊຸມແຊວກັບ ກໍລະນີທີ 10 (ພະນັກງານ DHL), ວັນທີ 27 ມີນາ ໄດ້ຮູ້ຂ່າວວ່າ ກໍລະນີທີ 10 (ພະນັກງານ DHL) ຕິດພະຍາດ ລາວຈິ່ງຈຳກັດບໍລິເວນໂຕເອງຢູ້ຫ້ອງພັກ, ບໍ່ໄດ້ອອກໄປ ທາງໃດ ຈົນຮອດວັນທີ 6 ເມສາ, ວັນທີ 7 ເມສາ ເລີ່ມຮູ້ສຶກເຈັບຫົວ, ຖືຄີງໄຂ້, ລີ້ນຊາ, ດັງບໍ່ໄດ້ກິ່ນ, ມີຂີ້ກະເທີ ແລະ ຫາຍໃຈຝືດ ແຕ່ຍັງບໍ່ກວດ, ວັນທີ 8 ເມສາ, ອາການລີ້ນຊາຫຼາຍຂຶ້ນ, ດັງບໍ່ມີກິ່ນ, ຫາຍໃຈແສບດັງ, ໄຂ້ ແລະ ມີອາການຫາຍໃຈຝືດ, ຜູ້ກ່ຽວໂທປຶກສາແພດ, ລົດນຳສົ່ງຄົນເຈັບໄດ້ຮັບໄປໂຮງໝໍ ມິດຕະພາບ ພ້ອມເກັບຕົວຢ່າງ ແລະ ກວດພົບວ່າຕິດເຊື້ອ, ມີຜູ້ສຳພັດໃກ້ຊິດກັັບຜູ້ກ່ຽວ 9 ຄົນ, ເຊິ່ງໄດ້ມີເບີໂທລະສັບຕິດຕໍ່ ແລະ ໄດ້ແນະນຳ ຈຳກັດ​ບໍລິເວນຕົນເອງແລ້ວ.

– ຈຳນວນຜູ້ສໍາຜັດໃກ້ຊິດທັງໝົດທີ່ໄດ້ຕິດຕາມ ແຕ່ວັນທີ 23 ມີນາ ຮອດວັນທີ 8 ເມສາ 2020 ມີ ທັງໝົດ 292 ຄົນ . ໝົດກໍານົດຕິດຕາມທັງໝົດ 217 ຄົນ. ໃນວັນທີ 8 ເມສາ 2020 ຍັງສືບຕໍ່ຕິດຕາມທັງໝົດ 84 ຄົນ.

ກໍລະນີຕິດເຊື້ອພະຍາດຄົນທີ 16, ເພດຍິງ ອາຍຸ 23 ປີ, ນັກສຶກສາຢູ່ວິທະຍາໄລລັດຕະນະ, ບ້ານໜອງດ້ວງ, ເມືອງ ສີໂຄດຕະບອງ, ນະຄອນຫຼວງວຽງຈັນ ສ​ປ​ປ​ ລາວ ພົບ​ຜູ້​ຕິດ​ເຊື້ອເພີ່ມ​ຂື້ນ 1 ຄົນ ລວມ​ເປັນ 16 ຄົນ

ຕິດຕາມ​ຂ່າວການ​ເຄືອນ​ໄຫວທັນ​​ເຫດ​ການ ເລື່ອງທຸ​ລະ​ກິດ ແລະ​ ເຫດ​ການ​ຕ່າງໆ ​ທີ່​ໜ້າ​ສົນ​ໃຈໃນ​ລາວ​ໄດ້​ທີ່​ Facebook Doodido