ນໍ້າຕົກຕາດຜາສ້ວມແຫຼ່ງທ່ອງທ່ຽວທີ່ມີຊື່ຂອງ ແຂວງຈຳປາສັກ
- Superphil Phil
- Mar 31, 2020
- 1 min read
ແຫຼ່ງທ່ອງທ່ຽວນ້ຳຕົກຜາສ້ວມ ແມ່ນໜຶ່ງໃນແຫຼ່ງທ່ອງທີ່ມີຊື່ສຽງຂອງ ແຂວງຈຳປາສັກ ຖ້າໃຜມີໂອກາດໄດ້ໄປຢ້ຽມຢາມສະຖານທີ່ແຫ່ງນີ້ ກໍຈະໄດ້ສຳຜັດກັບຄວາມງົດງາມຂອງນ້ຳຕົກຕາດຜາສ້ວມ, ຕາດໝາກແງວ, ຊົມວິວທິວທັດ, ເຮືອນພັກແຄມຫ້ວຍ ແລະ ຣີສອດແຄມນ້ຳຕົກ, ພ້ອມທັງຊົມບ້ານວັດທະນະທຳບັນດາເຜົ່າ ແລະ ທ່ຽວຊົມຖ້ຳພະຍານາກ.
ພາບ: fastfollownews.com
ອຸດທະຍານບາຈຽງ ນ້ຳຕົກຜາສ້ວມ ແຫ່ງນີ້ ຕັ້ັງຢູ່ເມືອງບາຈຽງຈະເລີນສຸກ ຫ່າງຈາກເທສະບານແຂວງຈຳປາສັກ ໄປທາງທິດຕາເວັນອອກປະມານ 30 ກິໂລແມັດ, ອີງຕາມ ທ່ານ ທຳຜາສຸກ ຈີປຣູ ແຈະກຣຽງ ເຜົ່າກຣຽງ ຜູ້ປະຊາສຳພັນນຳທ່ຽວປະຈຳແຫຼ່ງທ່ອງທຽວແຫ່ງນີ້ ໃຫ້ຮູ້ວ່າ:
ກ່ອນໜ້ານີ້ຫຼາຍສິບປີ, ຕອນທີ່ຂ້າພະເຈົ້າບໍ່ທັນໄດ້ມາຢູ່ບໍລິເວນແຫ່ງນີ້ ມັນເປັນພື້ນທີ່ປ່າຊຸດໂຊມ ພາຍຫຼັງທີ່ ທ່ານ ວິມົນ ກິດບຳລຸງ ນັກລົງທຶນຊາວໄທ ໄດ້ຮັບການສຳປະທານພັດທະນາເປັນແຫຼ່ງທ່ອງທ່ຽວທຳມະຊາດ ຕິດພັນກັບ ວັດທະນະທຳເຊີງອະນຸຮັກພື້ນທີ່ປ່າໄມ້ ໃນບໍລິເວນແຫ່ງນີ້ປະມານ 2 ກິໂລຕາແມັດ ຈຶ່ງໄດ້ຮັບການຟື້ນຟູໃຫ້ຂຽວງາມ, ອຸດົມສົມບູນ, ມີນົກໜູປູປານານ້ຳ, ມີການພັດທະນາໃຫ້ມີຮ້ານອາຫານ, ກິດຈະກຳຍ່າງປ່າ ແລະ ຍັງມີບ້ານຊົນເຜົ່າ ທີ່ສະແດງເຖິງວັດທະນະທຳ ຮີດຄອງປະເພນີອັນດີງາມຂອງບັນດາເຜົ່າລາວເຮົາ ເພື່ອຕ້ອນຮັບແຂກມາທ່ຽວຊົມ. ທ່ານ ທຳຜາສຸກ ອະທິບາຍກ່ຽວກັບ ຄວາມໝາຍຂອງນ້ຳຕົກຜາສ້ວມ ສູ່ຟັງວ່າ:
‘‘ສ້ວມ” ໃນພາສາລາວ ແມ່ນໝາຍເຖິງ ຫ້ອງນອນ ຮີດຄອງປະເພນີລາວແຕ່ດຶກດຳບັນ ໃນເວລາບ່າວ-ສາວແຕ່ງດອງເປັນຄູ່ຜົວ-ເມຍກັນ ຈະມີຜູ້ເຖົ້າຜູ້ແກ່ເປັນຜູ້ຈູງແຂນເຂົ້າສ້ວມ.
ການທີ່ນ້ຳຕົກແຫ່ງນີ້ ມີຊື່ວ່າ:
ນ້ຳຕົກຜາສ້ວມນັ້ນ ກໍຍ້ອນວ່າ ບໍລິເວນທີ່ນ້ຳຕົກລົງສູງປະມານເກືອບ 10 ແມັດ ລຽນລ້ອມໄປດ້ວຍຝາຜະໜັງຫີນ ຕັ້ງຊື່ຄືກັນກັບໄມ້ແປ້ນແອ້ມຝາເຮືອນ ແລະ ເປັນວົງກົມລັກສະນະຄືກົ້ນຫວີງ.
ພາບ: fastfollownews.com
ຢູ່ສະຖານທີ່ແຫ່ງນີ້ ຈຸດທຳອິດທີ່ພວກເຮົາໄປທ່ຽວຊົມ ກໍ່ແມ່ນ ນ້ຳຕົກຜາສ້ວມ ເຊິ່ງເມື່ອໄດ້ສຳຜັດຕົວຈິງກໍເຫັນວ່າ ສວຍງາມດັ່ງຄຳຊ່າລືອີ່ຫຼີ, ບົນສາຍນ້ຳຈາກພັກເບື້ອງເທິງ ນ້ຳແຍກກັນເປັນສາຍທະຍານຕົກລົງສູ່ດ້ານລ່າງຕາມຝາຜະໜັງຫີນແຕກກະຈາຍ ຂາວຄືປຸຍຝ້າຍ, ອ້ອມຮອບລຽນລ້າຍໄປດ້ວຍແມກໄມ້ໃບຂຽວຖິ້ມຮົ່ມເງົາປູຕາມໜ້ານ້ຳ ເຮັດໃຫ້ທົ່ວບໍລິເວນມີຄວາມສົດຊື່ນ, ເມື່ອໄດ້ສຳຜັດ ຮູ້ສຶກເຢືອກເຢັນໃນສາຍຕາ ແລະ ຊຸ່ມຊື່ນໃນຫົວໃຈ.
ຈາກບໍລິເວນນ້ຳຕົກຜາສ້ວມ ພວກເຮົາຍ່າງເລາະມາທາງຮ້ານອາຫານ, ຮ້ານຂາຍເຄື່ອງທີ່ລະນຶກ ຜ່ານຂົວເຫຼັກ ແລ້ວຍ່າງຊົມປ່າໄມ້ ຣີສອດທີ່ປຸກຕາມແບບຕ່າງໆ, ຊົມນ້ຳຕົກໝາກແງວ ແລ້ວເຂົ້າສູ່ບ້ານວັດທະນະທຳບັນດາເຜົ່າ, ຢູ່ທີ່ນີ້ໄດ້ເຕົ້າໂຮມເອົາເຮືອນບູຮານຂອງ 8 ຊົນເຜົ່າຈາກ 4 ແຂວງພາກໃຕ້ ແລະ ໄດ້ຈັດຕັ້ງຫໍຜະລິດຕະພັນຊົນເຜົ່າໄວ້ຄອຍຕ້ອນຮັບນັກທ່ອງທ່ຽວ.
ພາບ: fastfollownews.com
ພາຍໃນບ້ານວັດທະນະທຳບັນດາເຜົ່າ ມີການປຸກສ້າງເຮືອນທີ່ມີຮູບແບບເອກະລັກຂອງແຕ່ລະເຜົ່າ, ໃຈກາງຂອງບ້ານ ມີສາລາທີ່ເປັນບ່ອນເຕົ້າໂຮມເຮັດພິທີກຳຕ່າງໆ, ມີເຮືອນເສົາດຽວທີ່ເປັນບ່ອນພົບປະໂອ້ລົມກັນຂອງບ່າວ-ສາວ, ມີການຕ່ຳຫູກທໍໄໝ, ຫຍິບ, ປັກຖັກແສ່ວ ແລະ ສະແດງເຄື່ອງດົນຕີພື້ນເມືອງຂອງຊົນເຜົ່າ ເຊິ່ງໄດ້ສ້າງຄວາມປະທັບໃຈໃຫ້ແກ່ນັກທ່ອງທຽວ ທີ່ເຂົ້າມາທຽວຊົມ ຢ່າງບໍ່ມີວັນລືມ.
ພາບ: fastfollownews.com
ສະຖານທີ່ທ່ອງທ່ຽວ ອຸທະຍານບາຈຽງ ນ້ຳຕົກຜາສ້ວມ ເປັນທີ່ຮູ້ຈັກກັນດີຂອງນັກທ່ອງທ່ຽວ ພາຍໃນ 4 ແຂວງພາກໃຕ້ ແລະ ນັກທ່ອງທຽວຊາວໄທ, ແຕ່ລະວັນ ແຫຼ່ງທ່ອງທ່ຽວແຫ່ງນີ້ ໄດ້ຕ້ອນຮັບນັກທ່ອງທ່ຽວຈາກສາລະທິດ ທີ່ມາເບິ່ງມາຊົມ ຢ່າງບໍ່ຂາດສາຍ.
ນາງ ໃສ ພະນັກງານເກັບເງິນຄ່າປີ້ເຂົ້າທ່ຽວຊົມ ບອກວ່າ:
ປົກກະຕິ ນັກທ່ອງທ່ຽວມາຫຼາຍແມ່ນ ວັນເສົາ ແລະ ວັນອາທິດ, ແຕ່ມາຫຼາຍກວ່າໝູ່ແມ່ນ ວັນບຸນຕ່າງໆ ເປັນຕົ້ນ ວັນບຸນປີໃໝ່ລາວ, ວັນແມ່ຍິງສາກົນ… ເຊິ່ງປະລິມານລົດແມ່ນມີເຖິງ 300-400 ຄັນ, ສຳລັບຄ່າເຂົ້າທ່ຽວຊົມ ຄົນລາວ 5.000 ກີບ ຄົນຕ່າງປະເທດ 10.000 ກີບຕໍ່ຄົນ, ຄ່າຝາກລົດໃຫຍ່ 5.000 ກີບ ແລະ ລົດຈັກ 2.000 ກີບຕໍ່ຄັນ.
ພາບ: fastfollownews.com
ຖ້າໃຜໄດ້ໄປພາກໃຕ້ ກໍຢ່າລືມໄປແວ່ຊົມ ອຸທະຍານບາຈຽງ ນ້ຳຕົກຜາສ້ວມ ຮັບຮອງວ່າ ທ່ານຈະມີຄວາມປະທັບໃຈໃນທຳມະຊາດທີ່ສວຍງາມ ແລະ ຊື່ນຊົມຕື່ນຕາຕື່ນໃຈກັບ ວັດທະນະທຳຂອງບັນດາເຜົ່າ ທີ່ອຸດົມສົມບູນ ແລະ ມີຫຼາຍສິ່ງຫຼາຍຢ່າງ.
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Facebook Doodido
ແຫລ່ງທີ່ມາ: fastfollownews.com
Comments