ຄໍາວ່າ ຂວັນ ແລະ ຂວານ ຄວາມໝາຍແຕກຕ່າງກັນຄືແນວໃດ?
- Superphil Phil
- Aug 1, 2020
- 1 min read
ຄໍາວ່າ ຂວັນ ແລະ ຂວານ ຄວາມໝາຍແຕກຕ່າງກັນຄືແນວໃດ?
ຄວາມຫຼາກຫຼາຍຂອງພາສາລາວມີຫລາຍໆຄຳທີ່ອອກສຽງຄ້າຍຄືກັນ ລວມທັງຄວາມໝາຍກໍໃກ້ຄຽງກັນ ແລະ ເວລານຳໄປໃຊ້ ສໍານຽງສຽງເວົ້າກໍ່ແຕກຕ່າງກັນໄປ ຂື້ນກັບຄົນຢູ່ແຕ່ລະເຂດ, ແຂວງ ແລະ ແຕ່ລະພາກຂອງປະເທດລາວ ໂດຍສະເພາະຄົນຊົນເຜົ່າ ເວລາເວົ້າອອກສຽງຜິດພາດໄປເລັກນ້ອຍກໍຈະກາຍເປັນຄວາມໝາຍອື່ນ.
ເຖິງຢ່າງໃດກໍ່ດີ, ເຮົາມາຮຽນຮູ້ຄວາມໝາຍຂອງຄໍາສັບໃນພາສາລາວໄປນໍາກັນ, ເຊິ່ງໃນບົດຄວາມຕອນນີ້ ເຮົາຈະເວົ້າເຖິງຄວາມໝາຍຂອງຄໍາວ່າ ຂວັນ ແລະ ຂວານ ສອງຄໍານີ້ຖ້າເບິ່ງຈາກການຂຽນແມ່ນສາມາດຈໍາແນກໄດ້ຢ່າງຈະແຈ້ງວ່າຄໍາໃດເປັນຄໍາໃດເພາະວ່າສະກົດຕ່າງກັນຢູ່ ແຕ່ຖ້າເປັນການເວົ້າແມ່ນມີຄວາມຜິດພາດທາງດ້ານການອອກສຽງເປັນສ່ວນຫຼາຍ ແລະ ຄວາມໝາຍມັນກໍ່ຈະປ່ຽນຖ້າຫາກອອກສຽງບໍ່ຖືກຕ້ອງ. ສະນັ້ນ, ເພື່ອທໍາຄວາມເຂົ້າໃຈຢ່າງເລິກເຊິ່ງກ່ຽວກັບສອງຄໍານີ້ ຂໍອ້າງອີງຕາມຂໍ້ມູນຈາກວັດຈະນານຸກົມພາສາລາວ ສະບັບທີ່ ຄົ້ນຄວ້າ ແລະ ຮຽບຮຽງ ໂດຍ ທອງຄຳ ອ່ອນມະນີສອນ, ເຊິ່ງເພິ່ນໄດ້ອະທິບາຍຄວາມໝາຍສອງຄໍາສັບດັ່ງກ່າວ ໄວ້ດັ່ງນີ້:
ຄຳວ່າ ຂວັນ. ເປັນຄໍານາມ ໝາຍເຖິງ ສິ່ງທີ່ໜ້າຮັກ, ທະນຸຖະໜອມ, ຈິດໃຈ ຫຼື ກຳລັງໃຈ ຕົວຢ່າງ: ລູກຮັກ ເອີ້ນວ່າ ລູກຂວັນ; ເມຍຮັກ ເອີ້ນວ່າ: ເມຍຂວັນ; ຜົວຮັກ ເອີ້ນວ່າ: ຜົວຂວັນ; ເສົາທີ່ຍົກຂຶ້ນກ່ອນເອີ້ນ: ເສົາຂວັນ…
ຄຳວ່າ ຂວານ. ເປັນຄໍານາມ ໝາຍເຖິງ ຊື່ເຄື່ອງມືແນວໜຶ່ງທີ່ໃຊ້ຟັນໄມ້, ປ້ຳຕົ້ນໄມ້ ຫຼື ຖາກໄມ້ ເຊິ່ງມັນເຮັດດ້ວຍເຫຼັກ. ຕົວຢ່າງ: ຕົ້ນໄມ້ນີ້ໃຫຍ່ຫຼາຍ ເກີນກວ່າຈະໃຊ້ພ້າຟັນໃຫ້ຂາດໄດ້ ໃຫ້ເອົາຂວານມາຟັນຈະດີກວ່າ. ລູກເອີ້ຍ, ເອົາຂວັນຜ່າຟືນໃຫ້ມັນນ້ອຍລົງແລ້ວຈຶ່ງເອົາໄປດັງໄຟເດີ້!
ຕິດຕາມຂ່າວການເຄືອນໄຫວທັນເຫດການ ເລື່ອງທຸລະກິດ ແລະ ເຫດການຕ່າງໆ ທີ່ໜ້າສົນໃຈໃນລາວໄດ້ທີ່ Facebook Doodido
Comments